Inona moa ny atao hoe nude

Salama tompoko

Fiteny malaza tato ho ato ny resaka maquillage nude satria io indray izao moa no lamaody. Tsara io lamaody iray io satria azo entina andavanandro noho izy discret. Ary efa maro isika no nanao azy hatrizay satria ny ankamaroantsika dia manao maquillage maivana rehefa andavanandro. Maro anefa isika Malagasy no tsy tena mahay tsara ny atao hoe nude. Zaraiko aminareo ary ny kely mba haiko makasika io lamaody io.

Nude na koa hoe miboridana:

Ilay teny hoe nude dia midika hoe miboridana. Ny maquillage nude izany dia manakaiky ny lokon'ny hoditra miboridana (na koa hoe peau nue) Noho izany tsy loko akory ilay nude fa effet na koa rendu izany hoe fivoakana loko iray na maromaro amin'ny hoditra. Aza hadino anefa fa ny hanatsara no tanjona amin'ny maquillage izany hoe raha loko tena mitovy tsy misy valaka amin'ny lokon'ny hoditra dia tsy dia misy dikany loatra (afatsy ny fond de teint sy poudre izay tokony hitovy loko amin'ny hoditra) Tsy hoe transparent izany ny nude fa loko tena akaiky ny hoditra nefa marevaka kokoa mba ho tsara kokoa ny loko voajanahary. Tsy sanatria fonja anefa akory ny maquillage nude ka hoe tsy maintsy toy izao na toy izao. Fa rehefa manakaiky ny loko voajanaharin'ny hoditra dia nude no fiantso azy. Raha tsy izay ny fivoakany dia tsy nude zany fa zavatra hafa. Tsy voatery asiana anarany hoe nude, marevaka sns koa moa fa izay tianao sy manendrika anao no atao hoe tsara. Misy karazany maro ny maquillage nude. Ao ny manambatra ny maso marevaka na somary mavesatra amin'ny molotra nude na ny mifanohitra amin'izay. Ao ny manao maquillage nude eo amin'ny hodimaso fa mampisongadina ny fijery amin'ny eyeliner na mascara matevina tsara. Ao koa ny manao maquillage nude amin'ny maso sy ny molotra.

Hoan'ny fotsy hoditra dia loko beige manopy mavokely na manopy volom-boasary na manakaiky an'izay matetika no mivoaka nude. Ity sary ity izao dia mampiseho maquillage nude eo amin'ny olona fotsy hoditra. Na somary matroka aza ilay eo amin'ny maso dia hitantsika fa mifanakaiky ihany amin'ny lokon'ny hodiny.Ny molotra eto dia misy effet nude tanteraka izany hoe tsy marevaka sy hita hoe maquillé nefa tsy mifanalavitra amin'ny fihodirany.

 

Eto amin'ny sarin'i Rihanna izaodia hitantsika fa tsy loko mitovy amin'ilay sary eo ambony no miasa nefa nude ihany ny maquillage. 

 

Nude amin'ny hoho, ny hodi-maso, ny molotra sns

Ny maquillage nude dia azo atao amin'ny faritra rehetra azo maquiller-na izany hoe ny maso, ny hoho, ny hodi-maso sns. Ny fifidianana ny loko dia tsotra be: mila jerena ny loko voajanaharin'ny faritra ho haingona. Ohatra, jereo ny hohonao hoe mavokely tanora ve sa mavo sa mena? Dia izay loko mifanakaiky amin'izay no mivoaka nude eo amin'ny hohonao. Mitovy amin'izany koa ny molotra: mavokely ve sa marron sa mena? Aza misalasala manakaiky ilay lokomena eo amin'ny molotra ahitana hoe mitovitovy ve sa mifangarika be? Izay no mahatonga an'ilay hoe tsy hivoaka nude amin'ny olona mainty fihodirana avy aty Afrika mihintsy ny lokomena izay mivoaka nude amin'ny vehivavy fotsy fihodirana avy any Eropa ohatra.Noho izany, raha haka aingam-panahy amina sary ianao dia sarin'olona mitovitovy fihodirana aminao jerena. Aza hadino koa fa na olona mitovy fihodirana aminao aza izy dia tsy voatery hanendrika anao avokoa izay manendrika azy. Noho izany, ny tsirairay mihintsy no tsara mijery akaiky ny zavatra ho ampiasainy ary indrindra mijery ny lokony. Mbola averiko ihany fa na samy Malagasy izao aza isika dia tsy misy loko tokana hanendrika antsika rehetra izany.

Misaotra anao namaky
Mandra-piresaka tompoko

Le scotch, cet ami qui nous veut du bien

Salama tompoko

Fizarana fikafika fanaovana maquillage moa no tena namoronana ny Izay tia maquillage ka aleo ho hizara fikafika iray tena mety sy mahatsara zavatra. Tsy inona izany fany scotch. Azo ampiasaina tsara ny scotch mba hampahitsy ny maquillage amin'ny sisiny ivelan'ny hodimaso na koa ny coin externe. Apetraka manaraka ny firafitry ny maso ambany fotsiny izy dia alefa toy ny mahazatra ny maquillage. Ny tombony dia afaka mihoatra kely satria eo amin'ny scotch izay mihoatra fa tsy miforetaka amin'ny hoditra akory. Rehafa vita izany ny maquillage dia esorina ilay izy. Mba tsy hampiraikitra be azy dia aleo apetapetaka amin'ny tanana aloha ny scotch alohan'ny hampaisàna azy. Amin'izay miala ny lakôly tena miraikitra be. Marary mantsy raha iny lakôly miraikitra be iny no avy dia apetraka amin'ny hodi-tava. Izaho manokana dia tsy dia tena zatra mampiasa scotch satria rehefa manao eyeliner aho no tena mila hoe mahitsy be ny faran'ny maquillage. Nefa izaho moa tsy dia manao maquillage (maquillage miloko no tiako lazaina) + eyeliner miaraka hany ka tsy dia mampiasa scotch matetika.

Mety tsy mzava tsara angamba ilay fomba fampiasana scotch. Jereo io vidéo zaraiko eo ambany io fa mampiasa scotch aho ao. Toy ity amin'ny sary ity ny maquillage nataoko. Maquillage tsotra be izy ity, azo lazaina hoe maivana. Azo entina andavanandro.

Ity ny vidéo mampianatra manao azy io raha mahaliana anao.

Misaotra anao namaky
Mandra-piresaka tompoko

Manendrika antsika ny loko orange

Salama tompoko

Tsy tiako ny miteny hoe manendrika antsika gasy ny loko toy izao na toy izao satria na samy gasy aza dia tsy voatery hitovy foana. Misy ny fotsy, ny zarazara, ny mainty. Ao ny fotsy mena, ny fotsy mavo, ny mainty maka hendrika afrikana, ny mainty maka hendrika indianina. Bref, ny azoko lazaina makasika ny loko orange angamba dia hoe manendrika ny volo-koditra zarazara. Io tsinona no hitako fihodirana matetika hita amin'ny Malagasy. Efa maro ny olona hitako hendrehina loko orange, na amin'ny maso izany, na amin'ny molotra, na amin'ny hoho. Androany dia vernis orange sy mavo no asehoko anareo. Tena tiako ny fivoakany amin'ny hoditro ka zaraiko sao mahaliana anareo koa.

Mety misy manotany hoe inona ny marika sy anaran'ireo vernis ireo. Marika Densy ilay orange (teinte 21) Novidiana teny Analakely, ilay anaty sobika ireny. Ilay mavo kosa tsy misy marika mihintsy misoratra eo :/ Saingy toa mora hita io loko io. Mba handramo ary sao manendrika anao koa ny loko orange.

Misaotra anao namaky
Mandra-piresaka tompoko

Be théories ny tontolon'ny maquillage

Salama tompoko

Betsaka ny théories tsara fantarina sy arahina eo amin'ny tontolon'ny maquillage. Maquillage eto no resaka fa tsy soin (misy théories maro koa ny resaka soin, fa maquillage aloha no resahako androany) Anisan'ny zavatra nianarako tamin'ny vidéos ao amin'ny Youtube ny théories mahakasika ny maquillage. Maro tokoa izy ireny fa ny tonga ato an-tsaiko no holazaiko:

• Zava-dehibe tsy azo hialàna ny estompage mba tsy hifangarika ny loko miasa sa mifangaro tsara. Rehefa tsara estompage koa ny loko dia malefaka ny sisiny fa tsy mifaritra be. 
• Tsara raha ampiadiana ny fards tsotra sy ny fards mangirana na misy paillettes. Izany hoe tsara raha miaraka ampiasaina izy roa mba hivoaka kokoa fa tsy hoe fards mats daholo na fards mangirana daholo.
• Mahakely maso ny crayon mainty ao anaty muqueuse fa manalehibe fijery kosa raha crayon mitovy loko amin'ny hoditra (na mazava kokoa) no atao ao anaty muqueuse.
• Mampihiratra fijery ny fard mazava ambany volomaso (sourcils) sy eo amin'ny tendro anatin'ny maso (coin interne)
• Rehefa mavesatra ny maquillage eo amin'ny maso dia tsara raha atao maivana ny eo amin'ny molotra

Ohatra fotsiny ireo fa maro tena maro ireo théories tsara hampiarina rehefa manao maquillage. Théories ihany anefa izy ireny ary toy ny théorie rehetra dia tsy voatery ho araka antsakany sy andavany foana. Izaho manokana dia isan'ireo zaza maditra tia manandrakandrana izay tsy mifanaraka amin'ireo théories ireo. Sady resaka maquillage moa ilay izy ka sahiko dikaina. Raha tsy mety ny handrana ataoko dia tsy dia misy vokany hoe mety hanenenana loatra. Androany ary dia ilay fampiasana loko mate sy mangirana no somary nodikaiko kely. Loko mangirana efatra be izao no nampiasaiko.

Fards beige, maitso, prune ary marron antitra samy irisés no tena niasa. Nampiasa crayon rouge brique irisé koa natao base. Fa misy corail mat kely ihany aloha e dia beige mat teo ambany volomaso (sourcils) Somary "mitigée" aho amin'ny vokatra azo. Tsy diso fanantenana aho nefa tsy babo tanteraka koa. Saingy misy entiko manarina ny sisa izay. Efa haiko sahady hoe iza amin'ireo loko mangirana ireo no ovaina mate dia mety ahafinaritra kokoa ny vokatra.

Ho ahy dia tsara ny miainga amin'ny théorie raha maquillage no resahana. Avy eo afaka manandrakandrana, manao izay mahafinaritra azy ny tsirairay satria ny fifalian'ny tena aloha no zava-dehibe. Tsy haiko aloha ianareo fa ho ahy dia fialam-boly izy ity. Tena handramako daholo izao rehetra izao. Misy ny entiko mivoaka. Misy no alaiko sary fotsiny. Misy entiko mijejo eran'ny trano. Bref, je me fais plaisir.

Tsy mety tafiditra ilay vidéo fa jereo ato https://www.youtube.com/watch?v=azMxM7NS4ls

Ary ianareo ve mba mandika ireny théorie makasika ny maquillage ireny?

Misaotra anao namaky
Mandra-piresaka tompoko

Vaky ny fitaratra...

Salama tompoko,

Fambara loza hono raha vaky ny fitaratra? Tsy mino izany aho ;) Raha te hanao vidéo ho alefa ao amin'ny Youtube ianao, izany hoe mila maka sary tena sady mitandrina tsara ny cadrage dia appareil misy retour vidiana (na camescope io na fakan-tsary) Ny ahy tsy misy retour dia tsy maintsy manao système D mba hijerena azy. Hany ka fitaratra no afindrafindra araka izay hazavàna misy ato an-trano. Et c'est comme ça que le miroir s'est retrouvé par terre, en 658 morceaux :-(

Soa ihany fa efa "dans la boîte" ity tutoriel zaraiko androany ity vao nianjera ilay fitaratra.  Manga sy marron no loko miasa eto. Mora atao be izy io.

Ity ary aloha ny tutoriel anaovana azy. Dia mila mijery fitaratra hafa zany hoan'ny tutoriel manaraka.

Misaotra anao namaky
Mandra-piresaka tompoko

En amour avec mon vernis violet ;)

Salama tompoko,

Tsy dia misy resa-be atao aminareo aho anio fa te hizara fotsiny ny vernis anaovako androany. Novidiako teny Analakely, tamin'ireny mpivarotra vernis amin'ny sobika ireny izy ity efa elaela ihany izy. Volo-parasy tsara tarehy. Mitsiranoka tsara ilay vernis sady matevina ka mahafinaritra ery ny mametraka azy. Max Fine  izany ny marika dia laharana 50 ity ananako ity. Hoana vernis 500ar aloha dia afapo aho sady efa ela no nampiasako azy toa tsy maninona ny hoho :)

Ary ianareo ve mba mividy vernis eny amin'ny sisiny? Sa vernis de marque ihany? Inona ary ny marikana vernis mba tena mahafa-po anareo e?

Misaotra anao namaky
Mandra-piresaka tompoko

Fomba tsotra hikarakarana ny hoho voan'ny "mycoses"

Salama tompoko

Tsy nohon'ny tsy fahadiovana akory no mampisy mycoses amin'ny hoho fa champignon mifindra izy ireny ka mety azo amin'ny fandraisana tanan'olona. Mora miforona amin'ny hoho mando lava koa ny mycoses. Mora tsaboina anefa ny mycoses na dia mora miparitaka sy manaratsy hendrika ny hoho aza. Ireto misy fomba vitsivitsy afaka hitsaboana azy raha tsy te hampiasa fanafody chimique ianao:

• Afaka halona ranotsira ny hoho voan'ny mycose ka sira iray sotro no levonina anaty rano 4 sotro. Rehefa levona ny sira dia atsoboka ao ny hoho mandritra ny 30min. Kobanina amin'ny rano matimaty avy eo satria manaikitra ny sira raha avela ho maina eo
• Fampiasa anesorana mycose eo amin'ny hoho koa ny karibonetra. Tsy alona fa manomana rano kely misy karibonetra (caribonetra iray sotrokely hoan'ny rano efatra sotrokely) Rehefa levona ny karibonetra dia asio ny vovoa ka diovy amin'iny ny hoho rehetra. Afaka avela maina eo
• Tsara koa ny vinaigre de cidre raha te hitsabo mycose amin'ny hoho. Mila afangaro rano anefa fa tsy avy dia ampiasaina ka raha vinaigre de cidre 1 sotro no ampiasaina dia mila rano avo roa heny, izany hoe 2 sotro. Alona 30min ao ny hoho dia kobanina amin'ny rano matimaty avy eo. 
• Mandaitra koa ny menaka azo avy amin'ny oliva (huile d'olive) ka hosorana an'iny ny hoho rehefa ao an-trano. Tsy misy fetrany ny ora hametrahana azy eo ary afaka mamerina an'io hatramin'ny telo herinandro. 

Mila faharetana sy fahazotoana ny fitsaboana amin'ny fomba voa-janahary fa tsy toy ny fanafody chimique izay matetika dia ahitana vokatra ao anaty andro vitsy monja. 

Misaotra anao namaky
Mandra-piresaka tompoko

Je suis une NPA qui s'assume ;)

Salama tompoko

Efa nolazaiko anareo ve moa fa alohan'ny nitiavako maquillage dia Nail Polish Addict aho ;) Manana Vernis eo amin'ny zato eo aho na mihoatra kely. Maro ny loko hananako ary nisy fotoana aho nanotany tena hoe atao inona ary ireto vernis be dia be ireto? Ny ratsana folo fotsiny nefa ny vernis efa zato mahery. Na izany aza, tsy foy sanatria ho ariana anefa ny vernis fa tiana jerijerena eo. Misy fotoana aho tena tsy manao vernis mihintsy fa misy fotoana kosa dia tena tsy mitsahatra miloko ny hohoko fa miala ny eo dia mipetraka ny manaraka. Tsy dia zatra manao nailart koa aho satria mbola tsy zatra tsara ny tanako indrindra fa ny tanana havia izay mangovitra loatra. Noho izany dia loko ranoray no tena fanaoko saingy tiako kosa ny manao ilay antsoin'ny vazaha hoe accent nail. Io dia fomba iray hitondrana zava-baovao kely amin'ny hoho satria atao mitovy daholo ny lokon'ny vernis amin'ny rantsana rehetra afatsy ny eo amin'ny rantsana iray. Ny vernis doré mipetraka eo amin'ny manara-poana ohatra dia isan'ireo accent nail tena fanaoko. Hainareo ve aloha hoe rantsana iza no antsoina hoe manara-poana? Misy rantsana iray izay tsy dia mahay mijanona tsy mihetsika rehefa miforitra ny rantsana manakaiky azy. Iza ary izay rantsana manara-poana izay? Tsara tarehy ny tanana rehefa misy vernis doré io manara-poana io ka vernis mena, mavokely, volo-parasy, mainty na loko hafa ny amin'ny rantsana hafa. Tsy izany ihany mazava ho azy ny accent nail azo atao fa araka izay tian'ny tsirairay eo. Anisany accent nail tena tiako ohatra ity turquoise sy volo-parasy ity.

Tsy io anefa no tena tiako zaraina anio fa nailart tsotra kely nataoko hoan'ny magazine A votre santé izay lsa Le Mag. Tsy haiko raha efa hainareo fa izaho no miandraikitra ny rubrique maquillage ao amin'io magazine en ligne (et gratuit) io ka nailart tsotra nefa mampihaingo tsara ny hoho no nataoko tamin'ity indray mitoraka ity. Tsy dia mila zavatra maro fa vernis mitovitovy loko amin'ny hoditra ary vernis miloko telo samy hafa no ilaina. Nampiasa dotting tool koa aho fa raha tsy misy dia afaka mampiasa cure-dent na paingotra isika.

Araka ny hitatsika dia mena ilay teboka eo afovoany. Maitso sy mavo kosa ireo manodidina. Tsy voatery atao eo afovoan'ny hoho akory ilay sary fa azo atao amin'ny sisiny, amin'ny ambony, amin'ny ambany sns. Ny tanana havanana izao io miseho io (izany hoe asan'ny tanana havia) nefa toa azo ekena ihany. Mora izy io  fa mba handramo. Marina fa ririnina ny andro ka manjoretran'ny hatsiaka daholo isika nefa aleo asiana loko marevaka ny hoho hitondra hafanana kely e.

Misaotra anao namaky
Mandra-pihaona tompoko

PS: Raha manam-potoana kely ianao dia topazo maso ny magazine Le Mag. Tsy handoavam-bola izy io nefa dia maro tokoa ny toro-hevitra sy loha-hevitra zaraina ao. Tsara be ny loha-hevitra zarainy amin'ity volana ity satria Femme forte no nofidiany

Ny hevitro momba ny quad ELF

Salama tompoko

Efa tsy zoviana amitsika mpanaraka ny pejy Izay tia maquillage angamba ny marika ELF na Eyes Lips Face. Marika amérikana izy io, mpivarotra produits de maquillage mazava ho azy. Ny mampiavaka azy amin’ny maro dia ny vidin’ny entany izay mora raha oharina amin’ny marika fanta-daza hafa. Manomboka @ 1^€ izany vidiny izany ao amin’ny tranokala frantsay. Efa maro mpivarotra eto amitsika io marika io ary misy ireo mivarotra amin’ny vidiny mirary dia mirary tokoa.

Manana produits ELF maro aho fa ho resahako aminareo androany ireo quad (palette kely misy loko efatra) ka isan’ireny ilay Day 2 Night. Mainty, beige, rose gold ary prune no loko hita ao. Efa ela tokoa no naniriako azy io satria araka ny anarany dia afaka anaovana maquillage entina amin’ny atoandro sy entina amin’ny alina noho ireo loko ireo. Tsara io quad io satria marevaka tsara ny loko fa tsy matsatso rehefa apetraka amin’ny hoditra. Somary mamovoka anefa ireo loko mangirana ary hitako amin’ny ankamaroan’ny fards an’ity marika ity fa izay loko marevaka sy pigmentées tsara dia mamovoka matetika. Manana quad roa hafa aho mantsy, ilay Ocean dreams sy ilay Drama. Tsy mamovoka mihintsy izy ireo, saingy tsy dia pigmentés be ohatran’ilay Day to Night. Tsy dia olana amiko manokana ilay izy mamovoka. Nefa aleo lazaina anareo ihany raha mikasa hividy azy io ianareo. Mba hisorohana an'ilay fard milatsaka eo amin'ny tarehy dia aza ahosotra ny fard fa somary tsinginina, tapoter hoy ny teny frantsay.

Maquillage azo entina an-davanandro no zaraiko aminareo anio ary io quad Day to Night io no nanaovana azy. Niampy crayon mainty sy fard beige mifanakaiky loko amin’ny hoditra. Tsy hadino ny mascara. Mascaras roa no nampiasaiko teto: ilay misy brosse en plastique fohy ny nifiny dia manalava ny volomaso satria afaka mandray azy hatrany amin’ny fotony. Ilay misy brosse en poils lava kosa mampatevina azy. 

Maquillage maivana izy ity nefa somary smocky izay manome hendrika hafa kely ny maso satria ohatrany hoe “sophistiqué” kokoa ny fijery. Maro isika (izaho anisany) no tsy mampiasa eye-liner isan'andro. Izay no nahatonga an’ilay tsipika tsy najanona ho mainty matevina fa somary naravina. Raha te hanao eyeliner dia afaka asiana eyeliner amin'ny farany. Aoka izay ny resa-be fa ndao jerena ny fomba nanaovana azy

Jereo foana any barre d'informations (tsindrina eo amin'ilay soratra "plus" eo ambany vidéo) rehefa mijery ireo vidéo ao amin'ny youtube ianareo fa misy fanazavana fanampiny tsara ho fantatra foana ao. Lazaiko ao ohatra hoe aiza no afaka hividianana io quad Day 2 Night io. 

Misaotra anao namaky sy nijery

Mandra-piresaka tompoko